Púkaskottið Sigurveig Sóley

Púkaskottið okkar sem skírð var Sigurveig Sóley fæddist föstudaginn 29. apríl að kvöldi til. Hún var 6 dögum á undan áætlun og kom hratt og fljótt í heiminn og allt gekk vel. Hún verður því 3 mánaða þann 29. júlí nk. Merkilegur áfangi enda segja allir fróðir menn og konur að magakveisa og almenn ungabarnaóværð snarlagist þegar þessum merka áfanga er náð!

Þar sem við höfum nú prófað svona barnastúss áður þó liðinn séu 17 ár síðan ungabarn var síðast á svæðinu þá tökum við þessu með passlegum fyrirvara en það verður spennandi að sjá hvað gerist við þennan áfanga ;)

Daman er yndisleg, brosir, hjalar, hefur haldið höfði "nánast frá fæðingu", sterk og kröftug og er auðvitað einstaklega falleg en hún lætur mikið hafa fyrir sér...ungabarnakveisa og óværð og vælinn sem fylgir því og vill helst vera í fangi allan daginn og sofa þar líka. Henni finnst algjör óþarfi að sofa einhverja ungabarnadúra í nokkrar klst á dag eins og eldri bróðir hennar gerði samviskusamlega og "flest" ungabörn gera. Þessi dama tekur bara svona smá kríu í nokkrar mínútur í senn og þá er hún góð! Sem þýðir auðvitað að það er enginn tími fyrir blogg eða maraþonsáhorf á Greys eða Dr Phil seríur í sjónvarpinu hvað þá eitthvað annað enda erum við ekki í orlofi heldur 200% vakavinnu með fáum pásum, litlum svefni en fáum svo fallegt púkabros að launum að þetta sleppur alveg ;)

Púkaskottið er því algjörlega við stjórnvölinn og hefur gaman af því.

Reyni mögulega að skella einhverju inn hér af og til en þessar fáu dýrmætu mínútur sem daman sefur á daginn eru notaðar til að reyna hvílast ( því hún sefur auðvitað líka illa á nóttunni, til hvers að gera þetta auðvelt ) eða lágmarkstiltekt eða bara sitja í nokkrar mínútur og gera ekki neitt...

Þangað til hafið það gott - lífið hefur svo sannarlega breyst hjá okkur en eftir ansi mörg ár af útsofelsi og nokkru frelsi með ljúfa prinsinn okkar þá var viðbúið að daman myndi nú minna vel á sig - :)

Á laugardegi

Flensa með öllu tilheyrandi lagði undirritaða í rúmið fyrir rúmum tveimur vikum síðan. Kvefið og hóstinn eru nýlega farin á brott og líka eitthvað af sleni sem fylgir svona veikindum en allt að koma. Mikið óskaplega sem hægt er að verða "lítil" aftur þegar heilsan  fer frá manni þó ekki sé nema í nokkra daga. Bráðum 9 mánaða ólétta bætir svo ekki ástandið. Heilsan skiptir okkur svo miklu máli og finnum aldrei meira fyrir því en akkúrat þegar hún er ekki til staðar.

Fann fyrir þessu í borginni um daginn. Er vön að fara um eins og þeytivinda alltaf þegar ég er stödd í Reykjavík og gat það ekki í þetta skiptið þökk sé barni í bumbu sem ýtir á grindina og gerir göngu í besta falli kómíska og líka sársaukafulla.

Þannig passið upp á heilsuna ykkar kæra fólk og það er víst ekkert í heimi hér sjálfgefið. Að þessu sögðu þá fara að detta inn fleiri póstar og myndir næstu daga. Prinsessuherbergið góða er nánast tilbúið, undirbúningur á lokastigi og styttist í borgarferð til að bíða eftir því að daman mæti á svæðið.

Í millitíð veikinda var nú samt ekki hægt að sitja eða liggja alveg auðum höndum - þetta snýr nú aðallega að bóndanum þar sem frúin var nú til lítilla afreka. Það "vantaði" og já eiginlega í alvöru og gæsalappir óþarfar, einhverja mublu yfir vegginn í borðstofurýminu. Mikið búin að spá og spögglera, kaupa nýja skápa, smíða sjálf, horfa til snillinga eins og Soffíu hjá skreytumhus.is sem umbreytti Ikea hillu í ofsalega flotta hillueiningu sem þverar heilan vegg eða hvað?

Duttum svo niður á rúmlega 30 ára gamlan skenk sem var til sölu. Eflaust yfir 100 kílóin að þyngd úr massívri eik og viti menn...hann er bara komin hingað í Southfork með aðstoð kraftajötna og bara smellpassar :)

Meira um skenkinn góða fljótlega - njótið annars laugardagsins kæru vinir.
Hér er setið við lærdóm :)

Niðurtalning er hafin - 4 vikur til stefnu

 

Það styttist og styttist...fjórar vikur í settan dag og batteríin eru að tæmast. Frágangur í vinnu og skrifstofutiltekt eins langt og það nær. Magnað hvað maður telur sér trú um að geta farið frá tómu borði og "klárað" allt, það er víst aldrei svoleiðis. Svo rúllar skipið alveg áfram og siglir þó mann vanti um borð en það er stundum ágætt að halda að maður sé ómissandi ;)

 

Undirrituð og bóndinn voru í borginn um nýliðna helgi. Tíminn var auðvitað notaður í gæða samveru með einkasyninum sem var hér um páskana og hafði því ekki tíma til að sakna foreldranna í þetta skiptið, svo stutt á milli hittinga :) En einnig þurfti að koma við í Ikea og Rúmfó og jújú blessaða Bauhaus sem var okkar annað lögheimili þegar mestu framkvæmdirnir voru hér fyrir 2 - 3 árum.

 

Bleika prinessuherbergið er allt að smella. Fyrir utan gardínur þá vantar í raun bara bleiur og barn og þá er þetta komið! Daman mun þó sofa fyrst um sinn inni í svefnherbergi í fallegri vöggu sem er á leiðinni hingað austur frá dásemdar frænku. En þar sem hér er nægt pláss er gaman að dúllast í þessu herbergi og hafa líka rúmið tilbúið þegar þar að kemur.

 

 

Vona þið eigið gott kvöld framundan hvar sem þið eruð stödd og látið ekki ástand þjóðmálanna hér skemma fyrir ykkur innri frið, skreytinga- og framkvæmdagleði...þið munið að það þarf ekki að kosta miklu til. Bara einn spreybrúsi og hægt er að umbreyta gömlu í nýtt :)



Demantahöldurnar

Nú eru komnar höldur á kommóðuna góðuna og eins á fataskápinn. Voru settar á fyrir nokkru síðan en gleymdist bara að taka myndir. Er einnig búin að "poppa" upp náttborðin okkar með þessum höldum þannig það er hægt að nota þær víða.

 

 

 

 

Þessar höldur voru pantaðar af Ebay og voru 10 stk. á tæplega 1.100 kr. má sjá hérna. Voru rúmlega 1,5 viku á leiðinni og settu því hraðamet samanborið við að panta frá Mister Ikea á höfuðborgarsvæðinu...það er víst svo agalega langt hingað austur;)

 

Bara mjög ánægð með þessar höldur og koma vel út. Eigið annars ljúft kvöld framundan á þessum langa föstudegi.

 

 

 

Takk fyrir innlitið :)

Páskafrí...bara súkkulaði og einfaldleiki

Það verður lítið páskaskreytt í ár. Búið að kaupa gula túlipana og nóg er til af súkkulaði og það verður að duga. Páskreytingar ársins fela í sér áframhaldandi barnaundirbúning og að njóta þess að fá að hafa einkasoninn í heimsókn yfir páskana en hann er í útlegð fyrir sunnan í framhaldsskóla og fótbolta, alveg að verða 17 ára en samt alltaf litli prinsinn sem fær brátt bílpróf. Það sem tíminn líður og því er mikilvægt að njóta litlu hlutanna, þeir skipta mestu máli þegar uppi er staðið.

Þegar það vill svo heppilega til að undirrituð og viðhengi búa í gulu húsi þá verður það bara páskaskrautið í ár :)

 

Skelli inn myndum á morgun af demantahöldunum góðu sem prýða nú kommóðu og skápa. Pantaðir frá Ebay og voru svei mér þá fljótari hingað austur á land frá Kína en sending fá Ikea í borginni um daginn, gaman að þessu;)

 

Njótið skírdagsins hvar sem þið eruð stödd.

Blóm og borð

Vona ykkur hafi þótt innlit í barnaherbergið skemmtilegt. Það er enn í vinnslu, ekki tilbúið en er að taka á sig mynd. Svona til að viðhalda einhverri virkni þá kemur hér stuttur póstur en takið eftir...þriðja daginn í röð! Já sko mína - þreyta í líkamanum sem undirbýr komandi átök en þá er gott að notast við sófann og kvöldin og glamra aðeins á lyklaborðið.

Okkur vantaði nýtt sófaborð í stofuna. Komin með annan sófa í stofuna sem hún yndislega systir mín átti og nýtur hann sín betur þar en í sjónvarpsherberginu sem nú er orðið barnaherbergi...úff þetta er að verða of flókið:)

En við vorum búin að skoða þau borð sem voru til í verslunum og þegar frúin er með stíl sem er frekar gamaldags og sveitalegur samanborið við nýtísku-minimalisma sem er mjög fallega hönnun bara ekki í stíl við innvolsið hér þá var úrvalið ekki mikið. Og hvað gera bændur eða bóndi þá...jú smíða bara nýtt borð!

 

 

 

 

 

Það er ansi mikill lúxus að hafa einn sprelllifandi "Bubba byggir" hér á bæ sem er ekki lengi að gera og græja og virðist aldrei skorta hugmyndir eða kraftinn. Ég læri kannski að smíða bara seinna;)

 

Takk fyrir innlitið kæru vinir.

 

 

 

Prinesssuherbergi í vinnslu

Þá höldum við áfram með myndarennslið...prinsessuherbergi í vinnslu. Hér má sjá hvað herbergið breytist mikið þegar komnir eru hvítir listar í kringum gluggana og eins búið að filma græna marmarann í burtu í gluggakistum eða sólbekkjum eins og sumir kalla víst. Það var snjór úti fyrir nokkrum vikum þegar sumar myndir voru teknar og því svona blámabirta á nokkrum myndum.

 

Gleymdist að taka fyrir-mynd af kommóðunni en hún var brún áður en hún varð svona ljómandi fallega barbie bleik. Nú eru einnig komnar höldur á kommóðu og fataskáp en vantar að smella af nýjum myndum til að sýna það betur.

 

 

 

 

 

Viljið þið sjá hvað gamli brúni sjónvarpsskápurinn sem keyptur var í Tekk Company árið 2000 er bara svona líka fallegur hvítur og búin að mjókka í tvennt :)

 

 

 

 

Gamlir blúndukjólar sem við systur notuðum sem ungabörn :)

 

 

Þetta er bara að verða svona ljómandi fínt og mjög lukkuleg með það sem komið er. Ég bæti við fleiri myndum næstu daga en "demantahöldurnar" eru komnar á sína staði, svo vantar gardínur og allskonar meira sem hægt verður að nálgast í borginni um komandi mánaðarmót, mestmegnis óþarfa puntudót en þegar von er á stelpu í heiminn og foreldrar á þessu heimili kunna bara á strákastíl þá er gaman að leika sér aðeins með dúllerí og tilheyrandi.

Takk fyrir innlitið :)

Allt fer á fullt...einmitt

Jæja þá!
Síðasti póstur var birtur og skrifaður í byrjun janúar. Það hefur svo sannarlega verið mikið og margt á fullu hér en að skila því í einstaka bloggpóstum...nei ekki alveg að gera sig greinilega.

Frúin hefur kannski "smá" afsökun. Bumbuvikurnar eru orðnar rúmlega 33 takk fyrir og því farið að síga á seinni hlutann. Orka og kraftur til að framkvæma, gera og græja kom seint og góð leti verið í gangi suma daga. Það hefur hins vegar breyst sl. vikur og nú er undirbúningur á fullu að taka á móti litlu prinsessunni með tilheyrandi eymslum og ó-ó aumingjavæli hjá gömlu kellu sem verður ofsalega aum í skrokkinum þegar mikið er í gangi bæði í vinnu og á heimili enda komin 17 ár síðan líkaminn var síðast notaður í þessum tilgangi ;)

 

Spurning hvort þið viljið aðeins sjá hluta af því sem hefur verið sýslað við hér að undanförnu og er svolítið bleikt en samt vonandi ekki of bleikt?

 



Sko...við færðum sjónvarpsherbergi fyrir jólin. Það er nú vistað þar sem skrifstofu-breytist í drasl herbergi - var áður. Því var ákveðið að barnaherbergi fyrir litlu prinsessuna yrði í gamla sjónvarpsherberginu. Sjáið til, þetta hús okkar Southfork var byggt í kringum 1975. Herbergið sem um ræðir voru einu sinni og líklega upphaflega tvö lítil aðskilinn herbergi sem var svo opnað á milli áður en við fluttum hér inn. Hentar mun betur svona í stað tveggja lítilla kústaskápa.

Svona var umhorfs þegar við keyptum Southfork. Síðan þá er búið að búa til vegg þar sem hurðir sem er fjær okkur er og eins var skápurinn á myndinni tekin í burtu og bóndinn græjaði innbyggðar hillur í staðinn, hurðir eru hér hvítar með listum eins og margir vita og núna hvarf græni marmarinn þökk sé Bauhaus filmum :)

 

En þá var bara að byrja - við máluðum hluta af þessu herbergi í sama lit og ganginn fyrir nokkrum árum, hreindýrabrúnn.



Svo þurfti að ákveða lit á veginn í staðinn fyrir þann brúna...

 

 

 



Svo fór gamli sjónvarpsskápurinn í snemmbúna megrun. Bóndinn sagaði skápinn í tvennt því hann var vel djúpur og ekkert verið notaður síðustu árin. Það voru því annað hvort haugarnir eða gefa honum annað líf bara, voru hlynntari þeirri leiðinni :)

 

Liturinn sem fór á veggina eftir nokkrar prufur heitir Londongrár. Ákváðum að blanda saman gráum, bleikum, hvítum og aðeins fjólublálitum tónum. Þetta verður stelpuherbergi með öllu tilheyrandi en það er ágætt að hafa veggina aðeins hlutlausari, amk. fannst okkur það koma bara vel út.

 

 

Búið að skella listum í kringum gluggana eins og eru hér á nokkrum stöðum.

 

 

Svona er liturinn í dagsbirtu...kemur bara vel út.

 

 

 

Framhald á morgun...? Já er það ekki bara...takk fyrir innlitið þið sem voruð ekki fyrir löngu búin að gleyma litla Púkablogginu :)







Allt fer á fullt

Einkasonurinn er farinn aftur í borgina og sama dag komu hér óvænt leigjendur á neðri hæðina sem áttu ekki að koma fyrr en 1. febrúar! Síðustu tveir dagar hafa því verið annasamir með eindæmum svo vægt sé til orða tekið að græja nokkurs konar orlofsíbúð sem átti að nýta janúarmánuð allan til að stússast í. Bóndinn hefur verið við sama heygarðshornið á einhverju orkutrippi sem virðist ekki hverfa þegar kemur að framkvæmdum. Það var ákveðið að loka neðri hæðina af og gera hana að sér íbúð með möguleika til útleigu og var þeirri hugmynd þjófstartað í gær. Því verða íbúar þarna niðri til loka apríl og þá styttist í að næsti íbúi birtist sem nú leigir eina bumbu og verður líklega með fastan leigusamning á heimilinu til amk. næstu 18 áranna.

 Jólaskrautið er farið niður í kassa en jólatrénu verður fleygt út um helgina en skrautið af því er farið þannig það stendur bara eins og illa gerður hlutur í stofunni þangað til. Eins og það er hlýlegt og gott að hafa allt sem fylgir jólum og skrauti þá er ég líka ósköp fegin að losna við það. Hafa aðeins einfaldara yfirbragð og stílhreinna þó nóg sé nú eflaust hér af smádóti en smekkur er misjafn sem betur fer:)



 

Klæjar í lyklaborðið að panta mér fallega dagbók fyrir árið 2016. Er og hef alltaf verið sjúk í dagbækur og að skrifa niður. Það eru tvær íslenskar sem hafa verið vinsælar undanfarið. Önnur þeirra fæst á síðunni www.munum.is og er hönnuð af tveimur íslenskum ungum konum og byggist á því að hafa jákvæða sálfræði að leiðarljósi. Bókin er búin að vera svo vinsæl að hún víst uppseld en von er á nýrri prentun enda með sniðug og hvetjandi orð á síðunum eins og sjá má og greinilega markaður fyrir svona bók.

 

 

Af hverju var ég ekki búin að hanna mína eigin dagbók fyrir löngu síðan,hafandi svona gaman af dagbókum? Note so self : Vera vakandi fyrir hugmyndunum þegar þær koma upp í kollinn, annars bara fara þær á næsta stað þar sem viðtakandinn er tilbúin til þess að taka við þeim ;)

 

Svo er önnur íslensk sem heitir Tíminn minn 2016 búin að vera til sölu að undanförnu líka m.a. hjá Eymundsson og víðar.

 

 



Sjálf er ég agalega skotin í dagbókinni hennar Jennifer Jones sem er með skipulagsblogg og er hrifin af litum og skemmtilegheitum til að poppa upp allt skipulag sjá hér.

 

 

Hún er jafnframt með sölusíðu á Etsy og hægt að panta vörur frá henni þar.

 

Fleiri týpur er svo hægt að sjá á síðunni Erin Condren og af nægu að taka.

 

 

Hugsa málið, mögulega verður splæst í eina svona "útlenska" tegund, enda margar svo flottar. Hafið það gott þar til næst og takk fyrir innlitið :)